SALEUM DARI KAMOE DI SUWEDIA

image
Assalamu'alaikum wahé e akhi
Keu bandum droneuh tuha ngon muda
Beu sihat tuboh bék na njang seu-i
Geutanjoë bandum teutap meusjèëdara

Na haba barô lôn kalon di televisi
Meunan tjit buno lôn batja beurita
Haba tanoh wakaf njang di Arab Saudi
Seunambong beurita awak BPKH

Reuntjana awak njan keumeung investasi
Teuma that gandjé wahe sjèëdara
Awak mat péng hadji nanggroë si pa-i
Keumeung djak investasi u lua neugara

Pakon beumeutjéh di Arab Saudi
Pakon hana investasi sinan di Indonesia
Njan keuh meunan salah sabôh bukti
Ulôn sjök wasangka meunan tjit tjuriga

Dipeugah droë investor untuk djadjaki
Sabab berpengalaman bak mat Rupia
Supaja na manfaat keu djamaah hadji
Meunan djiratôh bak dipeugah haba

Ureuëng Atjèh djino keubit that apati
Meunjoë djampu djaroë dari pulô Djawa
Kon sabab rasis atawa pih deungki
Atjèh that seungsara meunan tjit trauma

Bék ka djak tjukèh wakaf di Arab Saudi
Bék ka djak mita paké eunteuk meupeukara
Sabab tanôh njan ata ureuëng Atjèh asli
Ban saboh nanggroë djitém meudawa

Bah that pih ka peugah ateuh nan djamaah hadji
Hana pajah awak BPKH njang kelola
Disidéh na Nadzir ureuëng Arab Asli
Bak awak Arab njan keuh lubèh kamoë peutjaja

Meunjoë pih hawa ka djak investasi
Peuë keuh hana teumpat laén teuma?
Bék ka djak tjukèh ata Baitul Asyi
Atjèh ban sigom dônja pih akan murka

Bék ka djak peugah kamoë hana Islami
Hana bantu Muslim njang na di Djawa
Watèë rakjat kamoë maté djipoh lé TNI
Pakon hana ka peugah meubatjut haba

Bandum ureuëng Atjèh njang lôn hubungi
Peuë keuh di Fesbuk atawa group WA
Kesimpulan bandum hana geusetudjui
Meunjoë wakaf Atjèh njan dikelola lé BPKH

Peukatuen awak BPKH kamoë monitori
Beurangkahoë ka djak akan na beurita
Meunjoë pih awak kah keumeung investasi
Lubèh got ka mita laba sidéh di Djawa

Ôh no keuh batjut haba ulôn rawi
Sabab ka djula malam sino di Éropa
Laén uroë teuma ta meureumpôk keulai
Saleuëm meutjhén ulôn dari Swedia