The Diary Game -Better Life Season 3 - 03.09.2021 Veqan pendir axtarışında

Salam Steemit Azərbaycan ailəsi. Hamınıza sevgi dolu gün arzulayıram. İstərdim ki, bu gün yaşadıqlarımı sizlərlə bölüşüm. Səhər yuxudan durub, çox doyumlu səhər yeməyimizi yedik. Bizim səhər yeməyimiz tez-tez dəyişir çünki yoldaşım da mən də fərqliliyi çox sevirik. Bu həftə biz səhər yeməyində veqan qoğal yeməyi seçmişik. Veqan qoğalın adi qoğaldan fərqi odur ki, tərkibində heyvan mənşəli süd, kərə yağı və yaxud yumurta olmur. Süd əvəzinə yulaf südü, yumurta əvəzinə kətan toxumu, və kərə yağı əvəzinə bitki yağı tökülərək bişirilir. Yeməyimizi yedikdən sonra çox sevdiyim yoldaşımı işə yola saldım. Sonra özüm də evdə xırda işləri görüb, işə hazırlaşdım. Bu gün böyük gündür, çünki mağazamızı köçürürük. Veqan mağazamız artıq həm də kafe kimi fəaliyyət göstərəcək. Bu səbəblə daha geniş yerə köçürük.

Mağazaya çatdım, müdirim, iş yoldaşım və veqan dostlarımla birlikdə kədərlənərək bir-bir ərzaqları toplamağa və köçməyə başladıq.

Bu köçdüyümüz mağaza Azərbaycan da açılan ilk veqan mağaza idi, bu səbəblə içərisində bir çox xatirələr var. Hələ bu divarda nə qədər veqan dostlarımızın izləri var. Həmçinin mənim də :)

Müdirim Vüsalə, hədsiz çox sevdiyim bir insandır, hamıya onun kimi müdir arzulayıram. Həm çox intellektual həm də möhtəşəm insani xüsusiyyətlərə malik insandır. Birazdan silinəcək olan divarın şəklini çəkməyə çalışır :)

Deyib gülərək, bir saat ərzində rəfləri boşaltdıq, sonra da deyirlər ki, veqanlar/qadınlar gücsüz olur ah bu cinsiyyətci absurd deyimlər yoxmu?!..

Sonra iş yoldaşım dedi ki, Suraxanı bazarında İran nemətləri mağazası var və orda 1.40 qəpiyə veqan pendir satırlar gedək ora baxaq. Mən də dedim ki, yaxşı gedək çünki Rəcəb işdə olduğu üçün,evə getmək istəmirdim, o evdə olmayanda çox darıxıram.
Hər nə isə, müdirim dedi ki, Suraxanı uzaqdır, gəlin gedək Nizamiyə, orda İran nemətləri mağazası çoxdur, ora baxaq əgər olmasa gedin Suraxanıya. Müdirim və iş yoldaşlarımla düşdük yola. Bir neçə mağazaya baxdıq, çox gözəl bitkilər, ədviyyatlar və meyvələr var idi amma veqan pendir tapa bilmirdik.

Yol boyu gördüyümüz bütün İran nemətləri mağazalarına girdik. Yolda qarşımıza qutab satan bir xanım çıxdı, biz də açmışdıq qutab yedik yol üstü, çox dadlı idi. Adətən qutablara kərə yağı vurulur amma biz xahiş etdik ki, bizim qutabları yağlamasın.

Qutabı yedik, müdirim Vüsalə getdi evə çünki evdə onu gözləyən iki uşağı var. Biz isə Samira, Alp və mən getdik ulduz stansiyasına. Ordan 184 nömrəli avtobusa oturub, getdik bir başa Suraxanı bazarına.

İran nemətləri mağazasına yaxınlaşdıq və gördük ki, vua la la, pendir var. Başladıq sevincimizi göstərməyə, hərəmiz 10 ədəd pendir götürdük, üstəlik digər veqan dostlarımız üçün də götürdük. Elə xoşbəxt idik ki, pendiri tapdığımıza, mağaza işçiləri bizə gülürdü :) Əslində onları başa düşürdük çünki özümüzü görməmiş kimi aparırdıq. Amma bizi də başa düşmək olardı çünki 1.40 qəpiyə veqan pendir tapmaq, Azərbaycan kimi bir ölkədə möcüzə kimi bir şeydir.

Toplam 60 ədəd veqan pendir alaraq, qayıtdıq də evimizə. Yasamala çatıb, evə lazım olan meyvə-tərəvəzləri də aldım, sonra uzanıb dincəldim. Daha sonra Rəcəb gəldi işdən, pendirin dadına baxdıq, çox bəyəndik.

Daha sonra oturub bu yazıları yazdım və yatdım:)