ඉතින් සුභ නව වසරක්!!
ඉතින් හැමෝම පරිස්සමෙන් ඇති කියල හිතනව. අද ලියන්න යන්නෙ ගෙවුන කාලය ගැන. අපිටත් නොදැනිම ගතවෙන කාලයේ අපේ ජීවිතේ මොනතරම් වෙනස්කම් වෙලා ඇතිද? ඉතින් 2023 අවුරුද්ද විතරක් අරන් බලමුකො. සමහර විට ඒ අවුරුද්ද ඔබේ ජීවිතේ සාර්තකම අවුරුද්ද වෙන්න පුලුවන්. තවත් කට්ටියක්ගෙ ජීවිතේ අනිත් පැත්ත ගහපු අවුරුද්ද මේක වෙන්න ඇති. ඉතින් කොහොමින් කොහොමහරි අපිට කට්ට කාගෙන තව අවුරුද්දක් ඇදගන්න පුලුවන් උනා. අපි එන්න එන්න වයසට ය්ද්දි ජීවිතේ ගොඩක් දේවල් වෙනස් වෙන්න ගන්නව, අපිට ඉස්සරහට යන්නනම් ඒකට හැඩගැහෙන්නම ඕන වෙනව. නැත්නම් ඉස්සරහට යද්දි ජීවිත් වෙන එක එච්චර ලේසි වෙන්නෙ නෑ.මේ කතාවත් ඒ වගේ එකක්.
රුපියලට ටොෆි 4ක් ලැබුණ කාලයක සිට එක ටොෆියක් රුපියල් 5කට ගන්නා කාලයක් දක්වා අපි උස් මහත් වීමු
"පිට්ටනියේදී හමුවෙමු " යි කියූ කාලයක සිට "ඔන්ලයින් එන්න" කියන කාලය දක්වා අපි උස් මහත් වීමු
සහෝදරියගේ චොකලට් හොරෙන් කෑ අවධියේ සිට ඇගේම දරුවන් බලන්නට චොකලට් මිළට ගෙන යන කාලය තෙක් අපි උස් මහත් වීමු
උදේ නැගිටින්න කම්මැලිව අම්මාට "තව විනාඩි පහකින් නැගිටින්නම්" කියූ අවධියක සිට එලාම් එක තව විනාඩි 5කින් දිගු කරන අවධිය තෙක් අපි උස් මහත් වීමු
අපට ඕනෑ දේ ඉල්ලා මහ හඬින් හඬා වැටුණු අවධියක සිට ඇතුළතින් බිඳ වැටී සිටියදීත් කඳුළු සඟවා ගෙන දරාගන්නා අවධිය තෙක් අපි උස් මහත් වීමු
"ඉක්මණින් ලොකු වෙන්නට" සිහින මැවූ අවධියක සිට "ආයෙත් පොඩි ළමයෙක් වෙන්නට ඇත්නම්" යැයි සිතෙන අවධිය තෙක් අපි උස් මහත් වීමු
"අපි මුණගැහිලා සැලසුම් කරමු" කිවූ කාලයක සිට " අපි මුණගැහෙන්න සැලසුම් කරමු" කියන කාලය දක්වා අපි උස් මහත් වීමු
දෙමව්පියන්ට බිය වී සිටි අවධියක සිට දෙමව්පියන් වෙනුවෙන් අයදින අවධියක් දක්වා අවසානයේ අපි උස් මහත් වීමු
එසේ උස් මහත් වන අතරතුර, වසරක් පාසා සෙමින් සෙමින් අප ජීවිත කොතරම් වෙනස් වන්නේද යන්නත්, තවත් වසරක් නොදැනීම ගෙවී ඇති බවත් අපි උගත්තෙමු..