Lol.... Again

..........काटड़े का प्यार.........

काटड़ा अरडावे था
झोटी नें बुलावे था
नया नया गाभरू पाक्या
जवानी का रंग चाख्या
न्यारे न्यारे कोतक करे था
झोटी नें पटाण के ध्याड़े भरे था
कदे बेल नें सिंगा में उलझाले
कदे घेटी में फसा ले
कदे सानी झोटी कानी बगावे
कदे पाणी की बाल्टी गुरडावे
पर झोटी के जमा चाला थी
काटड़े की जान का गाला थी
पहला पहला प्यार था
काटड़ा भी तैयार था
झोटी नें एक स्कीम भिड़ाई
काटड़ा के कान में बात बताई
या बात किसे नें ना कहिये
तडके दोफारे तैयार रहिये
जद जस्सी छेओ छेओ बोलेगा
जोहड़ पे पानी पयाण खातर खोलेगा
मोका देख के भाज ज्यावांगे
कदे नहीं उलटे आवांगे
फेर आपणी प्यारी सी काटडी होवेगी
जो रात नें आपने बीच में सोवेगी
इब आगले दिन का इन्तजार था
काटड़ा झोले समेत तैयार था
ज्यूँ ज्यूँ टेम लोवे आवे
काटड़ा प्यार के गाने गावे
आगले दिन दोफारा
गाम सुतया सारा
जस्सी नें बेल खोली
झोटी आँख मार के बोली
इब जस्सी काटड़ा नें पाया में घा दिया
दोनु जन्या नें लान्डा ला दिया
दोनु थक्गे
बिल्लू के खेत में रुक्गे
मुडके देखा तो साइकिल ठा रह्या था
जस्सी लठ लेई आ रह्या था
मजनू का भाजना सफल नहीं हो पाया
मार मार लट्ठ जस्सी उल्टा ल्याया
पिंडिया पे लील पड़े थे
उलटे थाण में खड़े थे
काटडे कै देखदिये तो खांसे थी
पर झोटी भीतर ए भीतर हांसे थी
इस बरगे बेरा नें कितन्या के ढूंढ ठुवा दिए
झोटी नैं जिन्दगी में कितने काटड़ा बिकवा दिए
यो बोला है
इसे बात का रोला है
बस खान की चीज टोया करे
झोटी किसे की नहीं होया करे
नुने जस्सी और की मीटिंग चाल रही
पैरा तले की जमीन हाल रही
आपने खातर खडा होगया
कटड़ा बड़ा होगया
नही तो आगे और अड़ेगा
आपा नें बेचना पड़ेगा
इब बिचारा झोटी के बिन था
काटड़ा का आखरी दिन था
घरक्या नें डिगा दिया
व्यापारिया ती चढ़ा दिया
कटड़े के प्यार की कहानी ख़त्म होली
झोटी नें जांदीआण बाय भी नहीं बोली
कटड़ा अरडाके रोवे था
झोटी के गले लाग्ण की बाट जोह्वे था
पर झोटी खेली खिलाई थी
काटड़ा का नाश करण आई थी
रै लोगों इन झोटिया तै बच के रह्ल्यो
ब्याह कराणा है तो माँ बाबु ने कहलयो
भाजोगे काटड़ा ज्यूँ मारे जाओगे
के बेरा कित बुचडखाने में तारे जाओगे
ये बुआ एक तो थारे खल बिन्दोले खावें हैं
उपर तै ब्याह किसे और गेल करावे हैं
संजीत सवाल इतना है बस सुधर जा
इन झोटियां के चक्करा में ना आ