ගෑස් වෙනුවට පොල්කටු අගුරු | 5% For SL-Charity

ගෑස් කිව්වාම මේ දවස් වල නම් හැමෝම වගේ බයවෙනවා. මොකද දැන් මාස දෙකක විතර ඉදන් ගෑස් ලංකාව හතරවටේම පුපුරනවනේ. ඒ වගේම තමයි මේ දවස් වල ගෑස් කඩේ ගන්නවත් නෑ. නිව්ස් වල හැමදාම පෙන්නවනේ ගෑස් ගන්න මිනිස්සු කොච්චර නම් පෝලිමේ ඉන්නවද කියලා. ගෑස් කොච්චර පිපිරුවත් මිනිස්සු ගෑස් ගන්න එක නතර කරන්නෙත් නෑ. මේ දවස් වල ගෑස් හරියට ඒ දවස් වල සිමෙන්ති ගන්න බලාගෙන ඉන්නවා වගේ. ලොරියෙන් කඩේට දාන්නත් කලින්ම බඩු ඉවර වෙනවා.

ඒක එහෙම උනාට හුඟක් අය ගෑස් වෙනුවට වෙන වෙන විසඳුම් හොයන්න පුරුදු වෙලා තියෙනවා. ගෑස් පාවිච්චි කරපු හුගාක් අය දර ලිප් වලට දැන් හුරු වෙලා තියෙන්නේ. අපිත් ගෑස් පුපුරන්න පටන් ගත්තට පස්සේ ගෑස් ගෙනාවෙම නෑ. ඒ වුනත් ගෑස් එකක් දැන් 2700ක් විතර වෙනවනේ. ඒ නිසා අපිත් මෙච්චර දවස් දර ලිපෙන් තමා ඉව්වේ.

ඔය විදිහට ඉන්නකොට අපේ මාමලගේ ගෙවල් ඉස්සරහ ගෙදර ඉන්න අයියා කෙනෙක් පොල්කටු අගුරුවලින් උයන්න පුලුවන් ලිප් හදන්න පටන්ගෙන විකුණන්න පටන් ගත්තා. ඒ ගෙදරට ගියපු වෙලාවක අම්මට පෙන්නලා තිබ්බා එකෙන් උයන හැටි. අම්මට ඉතින් මේක හිතට අල්ලලා හොදටම. උයන්නත් ලේසිලූ, ඉක්මනට රත්වෙනවලු. ඒක ගෙමූ කියලමයි කිව්වේ. ඔන්න ඉතින් අම්මගේ අසාව නිසාම ඒක ගෙනාවා ඉතින් ගෙදරට.

ඒ අයියා ගෙදරටම ඒක ගෙනල්ලා දීලා එකෙන් උයන හැටිත් අපිට කියාදුන්නා. කොහොම හරි ඉතින් ඊලගට තිබ්බ ප්‍රශ්නේ තමයි අගුරු ප්‍රශ්නේ. කඩෙන් අගුරු ගෙන්න යන්න උමනාවක් තිබ්බේ නෑ මොකද ගෙදර පොල්කටු තිබ්බ නිසා. ඉතින් අම්මයි මායි පොල්කටු ගොඩක් ගහලා ගිනි තියලා අගුරු ටිකක් හදාගත්තා.

දැන් එකේ කරන්න තියෙන්නේ ඉස්සෙලම පොල්කටු අගුරු ටික ලිප ඇතුලට දාලා ලාම්පු තෙල් පොඩ්ඩක් දාලා අගුරු ටික අවුල ගන්න ඕනේ. ඊට පස්සේ ලිපේ තියෙන ෆෑන් එක දැම්මට පස්සේ අගුරු ටික හොදට රත්වෙනවා. ඒ රස්නෙන් තමයි කෑම හදාගන්න තියෙන්නේ ඉතිං. මේකෙන් ඉක්මනට කෑම ටික හදාගන්න පුලුවන් මොකද හොදට රත්වෙන නිසා.

අන්තිමට ඉතින් ගෑසුත් නැතුව අගුරු ලිපකටම වැටෙන්න උනා අපිට. මොනවා උනත් ගෑස් වලට වඩා තරමක ලාභයක් මේකේ තියෙනවා කියලා කියන්න පුලුවන්.