Taysa, Kadyot Lang

Image Source

Kitang mga Pinoy nabansay gayud kita sa mga buhat sa atong panimalay. Gikan sa paghugas sa plato, paglampaso ug panilhig sa salog, paglaba sa mga sinina, paglimpyo sa palibot sa atong panimalay ug nagkalain-laing mga buluhaton sulod sa atong panimalay. Saya kaayo sud-ungon nga nagkasinabot ang tibook pamilya sa pagbahinbahin sa mga buluhaton nga malipayon.

Si papa bisi sa pagpamanday sa balay, si mama kamulong luto sa pagkaon alang sa iyang pamilya, ang mga anak nag-iyahay sa ilang mga tukang buluhaton. Dali ra kaayo nato makita kung ang usa ka panimalay gi alirongan sa mga taong gukihan, kay ang ilang panimalay, bisan tood ug bati apan hapsay ug limpyo tanawon. Matingala na lang ka nga daghan sa ilang mga kahigalaan ug silingan, ganahan mag tambay sa ilang balay kay lagi kuno haruhay.

Dili gyud nako malimtan ang among panimalay kaniadto. Pinobre lang kaayo. Binuhat sa mga kahoy ug nipa apan ang akong mga amigo ug amiga, anha sa balay manglaag. Gikan sa kanila hangtud usab sa mga barkada sa akong magulang, ganahan sila sa balay kay bugnaw daw kaayo ligidligiran. Dili na kinahanglan ug electric fan kay mosulod ra man ug iya ang hangin.

Image Source

Ang panginabuhi sa akong amahan laborer lang ug sa panahon nga walay siyay duty, nag garden usab siya. Dili gyud nako malimtan saunang panahon, mamubo pako sa mga tanum nga petsay ni papa ug uban pang mga utanon, gikan sa kamote, alugbati, kamatis ug uban pa. Mao nga bisan tood kami pobre, wala mi magkulang sa pagkaon. Gawas sa mga utanon, aduna pud kami daghang manok bisaya naka pensa ilalum sa balay.

Nindot kaayo hunahunaon nga ang problemahon sa akong amahan mao na lang ang pagpalit sa bugas ug ginagmay pampalasa sama sa asin, bitsin ug toyo. Suka diay, dili na kinahanglan kay mananggiti man akong amahan. Tinood. Kamatuoran niana, nahulog pa man gani intawn siya sa lubi nga kaniadto iyang gipananggutan.

Ang kulang namo kaniadtong panahona mao ang mga maayong panapot ug mga kabtangan sa ginatawag ug ref ug tv. Tungod sa among kalisod, ah dili kalisod, aw sa kawalad-on... aw dili pud sa kawalad-on kay daghan man kami pagkaon. Tungod sa kanihit ug salapi mao nga wala gayud kami niining mga kabtanga. Apan, matud pa nila, dili importante ang maong mga butang, mas importante ang atong mga kaugalingong pagkatao.

Uo, ikapanghinambog gyud nako ni nga natarong mi ug pagpadako sa among mga ginikanan. Natudluan kami pag-ayo kung unsaon pagkinabuhi ug matarong ug unsaon nga mahimong mga maayong tao. Dako kaayo ang akong pasalamat sa akong mga ginikanan nga tungod kanila, nakakat-on gayod kami sa angay makat-unan.

Image Source

Ang Panahon Karon

Apan sa panahon karon nagkaylap na ang mga tapulan. Kung kinsa pa tong medyo alanganin sa ilang panginabuhi, mao pa hinoon tong bagag nawong nga magtinapulan. Kung imong suguon, dayog ingon, "Taysa Kadyot Lang." In tawn ang inahan, ni dako na lang ang tingog ug sininggit kay pipila na ka oras ang nilabay, wala japon natuman ang iyang gisugo.

Magbugoy-bugoy kay aron ingnon isog apan diay hastang tapulana. Kung kinsa patong tapulan, mao pa hinooy dako ug kaon. Kung kinsa pa tong tapulan, mao pa hinooy kusog magbisyo. Sigarilyo diri, inom didto. Nakakwarta lang ug gamay, hala inom dayon, pasikat sa mga barkada. Wa sila masayod ang inig kahurot sa ilang kwarta, kadungan niana, mawala usab tong iyang mga barkada.

Unsa kaha ang naa sa mga hunahuna iining mga tawhana? Wala ba kini sila ga panglantaw sa ilang mga kaugmaon? Wala kaha kini silay mga ambisyon. Paminaw nako naa, apan wala lang siguro sila masayud sa angay nilang buhaton. Ug kung nasayud man, dili ganahan mo lihok kay lagi dakong tapulan. Pastilan.

Image Source

Na hala, kamo nay bahala ug unsay inyong ikatampo alang sa mga taong tapulan. Ang ako lang nga kung aduna kay nailhan nga tapulan, tambagi in tawn sila nga ang kinabuhi dili madala ug tapol-tapol. Kung gusto sila makabaton ug maayon kinabuhi, kinahanglan silang mo lihok. Ang kasagaran kanila, moingon man dayon nga, ahh kuntento nako sa akong kinabuhi.

Kuntento? Kuntento naka anang sa matag kaon nimo puro ATM (Ay Ta Ma)? Unsaon na lang kung mawala na si mama ug papa, kinsa na lang man imong pangayoan? Ang ending, makat-un ka na lang manghilabot sa dili imohang butang. Mahimo na lang hinoon kang kawatan. Basin diay swertehon ko? Swerte, pastilan nimo. Ang kinabuhi dili madala ug swerte2x. Lihok na Dong.