ក្តៅៗ! អាមេរិក បន្តហាមប្រាមពលរដ្ឋ សរុប៨ប្រទេស មិនឲ្យចូលទឹកដីអាមេរិក
សហរដ្ឋអាមេរិក បានពង្រីកវិសាលភាពនៃច្បាប់ហាមប្រាមលើការធ្វើដំណើរដ៏ចម្រូងចម្រាសរបស់ខ្លួន ដើម្បីហាមឃាត់ពលរដ្ឋចំនួន ៨ ប្រទេស មិនឲ្យចូលមកទឹកដីអាមេរិក ក្នុងនោះរួមមានទាំង កូរ៉េខាងជើង , វេណេហ្ស៊ុយអេឡា និង ឆាដ (Chad) ផងដែរ។
<figure>
</figure>
បើយោងតាមរបាយការណ៍ពីសេតវិមាន បានឲ្យដឹងថា ការរឹតបន្តឹងថ្មីនេះធ្វើឡើងតាមការត្រួតពិនិត្យសារឡើងវិញ បន្ទាប់ពីមានការចែករំលែកព័ត៌មានដោយរដ្ឋាភិបាលបរទេស។ ជាមួយគ្នានេះ ប្រធានាធិបតីអាមេរិក លោក ដូណាល់ ត្រាំ ក៏បានចេញសេចក្ដីប្រកាសកាលពីល្ងាច ថ្ងៃអាទិត្យផងដែរ។
លោក ត្រាំ បានថ្លែងថា «ការធ្វើឲ្យអាមេរិកមានសុវត្ថិភាព គឺជាអាទិភាព លេខ១ របស់ខ្ញុំ។ យើងនឹងមិនទទួលអ្នកទាំងនោះ មកក្នុងប្រទេសរបស់យើងឡើយ»។
<figure>
</figure>
គួរបញ្ជាក់ថា ក្រៅពីប្រទេសទាំង ៣ ខាងលើ ការរឹតបន្តឹងថ្មីនេះ បានធ្វើឡើងទៅលើប្រទេសចំនួន ៥ ផ្សេងទៀត ដូចជា អ៊ីរ៉ង់ , លីប៊ី , ស៊ីរី , យេមែន និង សូម៉ាលី ធ្វើឲ្យប្រទេសដែលត្រូវហាមប្រាម កើនឡើងសរុបចំនួន ៨ ប្រទេស។ បើប្រៀបធៀបនឹងបម្រាមលើកមុន រដ្ឋបាល ដូណាល់ ត្រាំ បានដកប្រទេសស៊ូដង់ ចេញពីបម្រាម ប៉ុន្តែបានបន្ថែមមកវិញ នូវប្រទេសកូរ៉េខាងជើង និង វេណេហ្ស៊ុយអេឡា។
<figure>
</figure>
ទន្ទឹមនឹងនេះ សេតវិមាន បានបញ្ជាក់ពីមូលហេតុនៃការរាប់បញ្ចូលប្រទេស កូរ៉េខាងជើង , វេណេហ្ស៊ុយអេឡា និង ឆាដ ចូលក្នុងបម្រាមថ្មីរបស់ខ្លួន ឲ្យដឹងដែរថា កូរ៉េខាងជើង មិនបានសហការជាមួយរដ្ឋាភិបាលអាមេរិក សូម្បីតែបន្តិចឡើយ ហើយខកខានរាល់តម្រូវការទាំងអស់ សម្រាប់ការចូលមកទឹកដីអាមេរិក។
ចំណែកឯប្រទេសឆាដ ដែលជាដៃគូប្រឆាំងភេរវកម្មដ៏សំខាន់ មិនបានចែករំលែកព័ត៌មានទាក់ទងនឹងអំពើភេរវកម្ម និងព័ត៌មានសាធារណៈផ្សេងទៀត ដែលសហរដ្ឋអាមេរិកទាមទារនោះទេ។
<figure>
</figure>
ប្រទេសវេណេហ្ស៊ុយអេឡា ដែលរដ្ឋាភិបាលត្រូវទទួលរងការដាក់ទណ្ឌកម្មសេដ្ឋកិច្ច ដោយសហរដ្ឋអាមេរិក នាពេលថ្មីៗកន្លងទៅនេះ ក៏មិនសហការគ្នាក្នុងការផ្ទៀងផ្ទាត់ថា តើពលរដ្ឋរបស់ខ្លួនបង្កការគំរាមកំហែងដល់សន្តិសុខជាតិ ឬសុវត្ថិភាពសាធារណៈ ឬយ៉ាងណា ហើយមិនទទួលជនដែលត្រូវនិរទេសដោយស្ម័គ្រចិត្តទៀតផង៕
Posted from my blog with SteemPress : http://khmernewsshare.com/archives/2231