My everlasting hobby..

ගොඩක් දවසකින්.. හැමෝම හොඳින් ඇති කියල හිතනවා. පහුගිය දවස් ටිකේ පුංචි පුංචි වැඩ කීපයක් නිසා තරමක් කාර්යබහුල උනා. ඒ නිසාම කාලෙක ඉඳල යන්න හිතන් හිටපු තැනකට අද තමයි යන්න ඉඩක් ලැබුණෙ.

මං මෙහෙම පටන් ගන්නම්. මං පොඩි කාලෙ ඉඳන්ම පොත් වලට ආදරේ කරන කෙනෙක්. පොත් පත්තර කියවන පුරුද්ද මට ආවෙ තාත්තගෙන්. එයා ළඟ තිබුණ මනහර, මුතුහර, සිව්දෙස කියල සඟරා එකතුවක්. ලෝකෙ ගැන එක එක තොරතුරු ඒවල තිබුණ. වැඩි දැනුමක් තේරුමක් නැති කාලෙත් මං ඒ සඟරා කියෙව්ව. මං ටික ටික ලොකු වෙද්දි ඒව දහ දොළොස් වතාවක් කියවල ඇති. ඒත් ආයෙත් කියෙව්වත් ගන්න දේවල් ඒ පොත් වල තිබුණ. තාත්ත අදටත් කියවන්න හරිම ආසයි. ඉරිද පත්තර අනිවාර්යෙන් ගන්නව. මං ගෙදර ගියාම අහන්නෙ හොඳ පොතක් එහෙම හම්බුණේ නැද්ද කියල.

මං ඉස්කෝලෙ, දහම් පාසලේ පුස්තකාලෙන්, යාළුවන්ගෙන් පොත් අරන් දවසින් කියවල ඉවර කරනව. ඒ තරං පිපාසයක් තිබුණ. ඒ කාලෙ ආසාවෙන්ම කියවපු පොත් ටිකක් තමයි ටොට්ටො චං, කල්ලන්දූවේ මුතු කොල්ලය, පාළු දූපත, සුදෝ සුදු, ගුරු ගීතය, පොලියානා..අම්මෝ තව ගොඩක් තියෙනව.

ඒ කියවිල්ල නතර උනේම නෑ. පේරාදෙණියේ සරසවි පුස්තකාලෙ තට්ටු අතරෙ ඉහළ පහළ යන එක ඒ අවුරුදු හතරෙම පුරුද්දක් උනත් උපරිම ප්රයෝජන ගත්තෙ නෑ කියලමයි මට නම් හිතෙන්නෙ. Assignments, Exam වලට තොරතුරු හෙව්ව එක ඇර තව ගන්න දේවල් කොච්චර නම් තියෙන්න ඇත්ද... Law පොත් තිබුණෙ තුන්වෙනි තට්ටුවෙ.හතර වෙනි තට්ටුවෙ තිබුණ පරණම පරණ පොත් මොනවද කියල මතක නැතත් මං ඉස්සර තනියම ඒ තට්ටුවෙත් පොත් රාක්ක අතරෙ රවුමක් දාල එනව. පොත් රාක්ක අතරෙ තනි උනාම හරිම අමුතු හැඟීමක් දැනෙනව. වැඩිය අතපත ගාල නැති පරණ පොත් සුවඳ පපුවටම දැනෙනව.

ඉතින් අද මං ගියෙ ගිනිගත්හේන මහජන පුස්තකාලෙට. කලින් ගිහින් තිබුණට Membership ගත්තෙ අද. පේරාදෙණියෙ වගේ ලොකු එකක් නෙවී. පුංචි පුස්තකාලයක්. පොත් රාක්ක අතරෙ ගියාට අර අමුතු හැඟීම ආවෙ නෑ. හැබැයි මං කැමති විදිහෙ පොත් දෙකක් හම්බුණා.

පුස්තකාලෙ තියෙන පොත් ඔක්කොම කියවන්නයි මගේ නම් බලාපොරොත්තුව.