GANTO PEDATI ( curito minang)

Manuruik curito turun tamurun pado suatu maso dahulu pedati marupokan moda transportasi tradisional nan banyak bajaso kapado niniak moyang kito sanak.

wakatu itu oto yo bana sarik basuo jarang batamu ,kalaupun ado oto itu hanya oto punyo urang balando nan manjajah nagari kito Itulah sababnyo pedati ko sangaik populer pado maso ituPendeknya kalau ado kabau sikua padati ciek, tu lah bos tumah, lah Samo Jo punyo oto L 300 kini nilainyo sanak.

Cubolah Kito bayangkan kalau Ndak ado padati, baakolah caronyo urang maangkuk hasil ladang kabalai, Tantu ka malaleh kuduak manjujuang saka dari tabek patah ka sangka, Sasak angok mikiua kopi dari koto tuo pasia Laweh ka payokumbuah, maangkuk durian dari sungayang ka balai , atau maangkuk rotan dari lintau , baralah ka payahnyo maangkuk hasil bumi dari ladang ka pasa2 Ganto padati

Takana dek ambo sangkek kenek dulu, katiko malam manjalang , bilo lah tadanga ganto padati mailia lobuah yo sabana taibo ibo hati dinyo sanak , sakali2 tadanga Pulo suaro pak kusia maalau kabau nyo, Sadiah hati mandanga languah kabau maelo padati sanak, tapi kabaalai ,lah itu pulo takadianyo

Dikampuang ambo ado surang kusia pedati yang legendaris sanak, namonyo Mak Bahar, bininyo banamo Andeh nian
Padati Mak Bahar ko manambang dari kampuang ka balai kamih sangka sanak, mambao pisang Jo saka sarato hasil bumi nan lain,

Pedati ikolah nan kodok kami pagayuik i dulu samaso itu , kadang2 kami disarayonyo mamuek barang , beko diagiahnyo kawa daun sa sayak surang,
Kalau dikona-kona samaso itu, Yo bahagia pulo rasonyo
Tapi sajak moda angkutan pedati terakhir berkiprah pado dekade '80an sampai kini pedati lah tingga kenangan c lai
Kehadiran pedati lah digantian dek sarana angkutan moderen , kalau taragak Bana mancaliak padati tapaso awak Pai dulu ka situs2 budaya , karano masih ado pedati nan jadi pajangan, untuak ka dicaliak2 dek turih.
Apakah sanak ado nan punyo pangalaman atau carito2 nostalgia tantang padati ?
Wassalam.